80 Anos: “A traxedia no mar, primavera de 1945 os pesqueiros “Cartagena” e “Nuevo Rosiña” afúndense nas nosas augas”
Por Xosé María Fernández Pazos. Cronista Oficial de Ribeira, historiador e xornalista
As augas do Atlántico fronte ás nosas costas foron escenario, na primavera de 1945, de dous tráxicos sucesos que enloitaron á comarca. O primeiro deles foi o 5 de abril, cando o o pesqueiro de Moaña “Nuevo Rosiña” tocou nun baixo preto de “Sálvora” indo a piques e levándose ós seis tripulantes. Parece que o exceso de confianza foi a causa do naufraxio.
Pero o naufraxio que mais impacto levantou por ser todas as súas vítimas da comarca, aconteceu 8 de abril, día no que desapareceu o pesqueiro “Cartagena”, sen que se tivesen noticias dos seus vinte e tres tripulantes. A alarma saltou cando o langosteiro “Bienvenido” atopou a chalana do “Cartagena” envorcada e a caseta da ponte flotando, xunto con diversos utensilios e aparellos de pesca, preto dos baixos de Rinchador. As pescudas iniciadas de inmediato non deron resultados positivos, aumentando a angustia entre os familiares e compañeiros dos mariñeiros.
Días despois, confirmábase o peor. O “Cartagena ” naufragara á altura do cabo Corrubedo e as consecuencias a perda da vida dos vinte e tres homes que formaban a súa dotación.
A investigación sobre as causas do naufraxio do “Cartagena” apuntaron a que o dia da traxedia atopábase o pesqueiro faenando xunto con outro barco de Aguiño en augas de Corrubedo. O mal tempo orixinou doulle un golpe de mar que parece ser foi a posible causa da traxedia ocorrida no lugar coñecido como A Telleira. O golpe arroxou o pesqueiro contra os baixos separándose a proa da popa quedando o motor lonxe do casco tal como narraría o emblemático buzo, José Teira, o Cabalán, quen traballaba na zona cando baixo ós restos do pesqueiro.
A busca do barco desaparecido mobilizou outros pesqueiros da zona. Finalmente, os restos do “Cartagena” foron atopados esnaquizados no baixo do Rinchador, a unha profundidade de 25 metros.
En relación con este naufraxio, celebráronse solemnes funerais na parroquia de Carreira. A cerimonia relixiosa, celebrada a principios de xuño, congregou a unha inmensa multitude procedente dos pobos veciños. Os actos fúnebres contaron coa presenza do Gobernador civil e xefe provincial do Movemento, Jesús María de Yraola, así como do Comandante de Mariña de Vigo e do delegado provincial do Instituto Nacional de Previsión, entre outras autoridades e xerarquías locais.
Estes dous naufraxios do “Cartagena” e do “Nuevo Rosiña” en tan curto espazo de tempo supuxeron un duro golpe para a comunidade mariñeira. A perda de tantos homes, moitos deles novos, deixou un baleiro nos seus fogares e na propia estrutura social das vilas costeiras. As mostras de solidariedade e o apoio institucional foron un reflexo da dor compartida e da necesidade de facer fronte ás adversidades que, con frecuencia, azoutan a vida no mar.
Estes tráxicos acontecementos quedaron gravados na memoria colectiva como un recordo constante dos riscos inherentes á profesión de mariñeiro e da importancia da seguridade na navegación.
Pero apenas seis meses antes a comarca sufría outro duro golpe, catorce mariñeiros, oito de Corrubedo, dous de Muros, un de Seráns-O Son, un da Pobra, un de Ferrol e un de Xixón perderon a vida a altura de Celeiro tralo naufraxio do pesqueiro Albatros
Lembranza e agarimo neste día a eles e ás súas familias e que foron homenaxeados o pasado sãbado polos vecinos de Carreira e Aguiño nun acto organizado pola Cofradía. D.E.P.
Relación de tripulantes do Cartagena
Francisco Fernandez Sampedro
Jose Vidal Arnoso
Antonio Arnoso Ayaso
Bernardo Dios
Francisco de Brañuelas
Antonio Crujeiras Perez
Francisco Fernandez Sampedro
Jose Fernandez Tizado
Jose Gonzalez Gonzalez
Jose Gonzalez Parada
Ignacio Lago Tizado
Jose Lampon Garcia
Jose Mera Rodriguez
Jose Muñiz Creo
Manuel Crujeiras Dios
Jose Rey Paz
Cipriano Sampedro Romay
Manuel Silva Paz
Francisco Silva Paz
Manuel Suarez Sampedro
Francisco Torres Calviño
Jose Vidal Arnoso
Cipriano Vilas Martinez